Walter Karl Mudrak: En Munken' - Sen vino - Kristnaska tasko (esperanto)

En Munken' estas bierfarej':
Plaĉa saloneg', sed kia bru'
Kaj kriad' ĉe pridubinda ĝu'!
Dank'al al Di' ne estis kongresej'.

En bierfarejo Art - vesper':
Inda la muzik', deklam' kaj scen',
Dume glas-tintad' kaj daŭra ĝen';
Por edif' maltaŭga atmosfer'.

Sed des pli jen en impona hal'
La Malferm-Soleno ravis nin
Kun unika festparol' - kulmin'.
Brilis, vivis nia ideal'!

Kaj en dom' de l' Universitat'
Evoluis la kongreslabor'.
Belaj tagoj tro rapidis for;
Sed instigo restis al agad'!

Sen vino...

Sen vino bone estas;
Ĝin realec' atestas:
Mi estas korgajul'
Sen alkoholstimul'.
Natur' kaj nobla in'
Ĝojigas pli ol vin'!
Do vinon laŭ konsci'
Ne trinkas mi.

Kristnaska tasko

Por esploroj kaj inventoj,
Por atom-eksperimentoj
Monstrajn sumojn oni ĵetas,
Dume en mizer' vegetas
Suferantaj mil kaj miloj. -
Fido al raket-armiloj,
Bruo pri triumf' teknika,
Tamen ne progres' etika!

En ĉi tiun atmosferon
Nun Kristnasko ree venas.
La ĉiaman festmisteron
Ĉu homaro ĝin komprenas?
Sankta, hela fest': Kristnasko!
Pac-agado, amo-faro
Ĝia senco, nia tasko
Ankaŭ por la nova jaro!