Ankaŭ tio estas io:
versi pri nenio,
se en kor' el incendio
restis nur skorio,
el iama revebrio
forsoninta krio.

Se el glora idealo
restis velka palo,
se rezultis el batalo
de la cel' nur malo
kaj la viv' sin en realo
montris larma valo.

Se ni tion kredi ĉesis,
kio trompkaresis,
se ekkon' sur ni ekpezis
kaj animon lezis,
kaj ni longe jam forgesis,
kion viv' promesis.

Malfacilas ja terure
al feliĉ' postkure
sekvi, serĉi plu laŭspure
ion enfuture
kiam cedi saĝmature
al ni restas nure.