Feliks Hiller: El Pasinteco (esperanto) - pasinteco.htm

Feliks Hiller
El Pasinteco.

Originala poemo.

Kiam en pasinta jaro
Arboj floris
Kaj ornamis
Mondon nian,... en kamparo
Mi adoris
Vin kaj amis !

Kiam la florar' burĝonis,
Brilis hela
Suno varma...,
Mi nur sole tiam konis
Vin, plej bela,
Vin, plej ĉarma!

Kiam venis nur julio,
Ĉarma horo
Maja pasis...
Tiam vi, ho kara Dio,
Sen doloro
Min forlasis!

Kiam nun printemp' revenas
Stranga ia
Kuras diro:
Vi por ĉiam apartenas
al alia
Fremda viro!!

Notoj

Feliks Hiller,
(Ni ne havas informojn pri li).
El: Esperanto-Praktiko, Berlin.
5-a jaro, n-ro 4, aprilo 1923.
Redaktoro: Karl Minor.