En la profunda kora Orko
De ĉiu homo loĝas porko.
Ĝi grincas, gruntas kaj grimacas
Kelkfoje, alifoje lacas.

Sed kion fari kun la besto?
Elĵeti el la mola nesto,
Entute — tion mi konfesas —
Kaj radikale, ne sukcesas.

Do, kelkaj homoj ĝin priridas,
Cetere ĝin sufiĉe bridas,
Por ke ĝi restu en la stalo
Kaj nur okaze karnavalu.

Aliaj homoj ege hontas
Kaj la bestaĉon pene frontas.
Sed tre lacigas tiu modo,
Kaj vana restas la klopodo.

Alia speco, tio veras,
Pri la bestaĉo eĉ fieras
Kaj spite al publika fio
Eĉ gloras ĝin en poezio.

Sed kiu pravas? Ĉu vi scias?
Ĉu tiu, kiu pene pias?
Ĉu tiu, kiu fanfaronas?
Aŭ tiu, kiu nur admonas?

Eĉ la ŝagulo ŝanceliĝas,
Sed fine tiel decidiĝas:
Diversaj estas la konceptoj
Nur, ĉar diversaj la adeptoj.