Reto Rossetti: Spito - Konstato (esperanto)

Spito

La fulmonubo tra l' ĉielo
kontraŭ la vento sin altrenas
La ondoj en alborda pelo
kontraŭ la tajdrefluo penas -
Eĉ ventokoko kun ribelo
kontraŭ la blov' la bekon tenas
Kaj same mi, sub spron-akcelo,
ofte la disan vojon' prenas.

Kuspe mi saltas al la malo:
kiel, se kavalir' ordone
pikas ĉevalon dekstrasprone,
iras maldekstren la ĉevalo.
Jen, se agitas tasko ia,
ĝin mi evitas - per alia.

Konstato

La virin' ne estas multo:
korpa logo, cerba stulto
ruzo, trompo kaj adulto -
tamen mi koncedas:
ŝi estas, malgraŭ ruzotekso,
malgraŭ plago kaj perpickso,
la plej bona kontraŭsekso,
kiun ni posedas!

Notoj
Kuspi: klini aŭ faldi ion kontraŭ la natura direkto. Reto Mario Rossetti, 1909-1994. Sviso, de frua infaneco loĝanta en Britujo. Profesoro, estro de fakultato pri art-pedagogio. Esperantisto de 1928. Redaktis "Esperanton" de UEA (1954-1955). Kunlaboris al "Literatura Mondo" (2a kaj 3a periodoj), "La nica literatura revuo" k.c. Iniciatinto kaj plurjara sekretario de la Belartaj Konkursoj de UEA. Estis proza redaktoro de Angla antologio (1957). Redaktis 33 rakontoj (kun Szilágyi, 1964) kaj Trezoro, La Esperanta novelarto (kun Vatré, 1989). Kunlaboris al La Internacia Lingvo, Faktoj pri Esperanto (1954). El: Heroldo de Esperanto, Scheveningen, Nederlando. N-ro 5(1175), 29-a jarkolekto, 16-an de marto 1953. Redaktoro: Teo Jung.

Notoj

Kuspi: klini aŭ faldi ion kontraŭ la natura direkto.

Reto Mario Rossetti, 1909-1994. Sviso, de frua infaneco loĝanta en Britujo. Profesoro, estro de fakultato pri art-pedagogio. Esperantisto de 1928. Redaktis "Esperanton" de UEA (1954-1955). Kunlaboris al "Literatura Mondo" (2a kaj 3a periodoj), "La nica literatura revuo" k.c. Iniciatinto kaj plurjara sekretario de la Belartaj Konkursoj de UEA. Estis proza redaktoro de Angla antologio (1957). Redaktis 33 rakontoj (kun Szilágyi, 1964) kaj Trezoro, La Esperanta novelarto (kun Vatré, 1989). Kunlaboris al La Internacia Lingvo, Faktoj pri Esperanto (1954).
El: Heroldo de Esperanto, Scheveningen, Nederlando.
N-ro 5(1175), 29-a jarkolekto, 16-an de marto 1953.
Redaktoro: Teo Jung.