Pasintnokte bubo Marko
sonĝis pri la zoo-parko.
Ŝtelirinte bestĝardenon
kion li ekvidis?
Jenon:
Kantas pri varmakva Nilo
serenadon krokodilo.
Frakumita, kiel grafo,
grave paŝas la ĝirafo.
Studas pulon la makropo
per moderna mikroskopo.
Jen grimacas, brak' ĉe brako,
paviano kaj makako.
Amkonfesas, kun aklamo,
al testud' hipopotamo.
Dancas urso, vang' al vango,
kun bubalo dancon "tango".
Viŝas ŝviton, for de l' nuko,
elefanto per naztuko,
Kaj sciuro - kia lukso!
eĉ regalas lin per nukso.
