Ho, kompatinda vi, popolo,
Iranta ĉiam al milit',
Pelata de diabla volo
Al malhonesta la profit'!

Ne restu sklavoj de aliaj,
Sed ĵetu la katenojn for,
Kaj estu homoj memkonsciaj
Pri via forto kaj labor'!

La mondon levu el mizero
De superstiĉ' de ĉiu spec',
Por ke fariĝu sur la tero
Por ĉiu homo liberec'!

Ho, koro de infan'...
Kiel kalik' de floro,
Levita al la suno,
Atendas ĝi la vivon,
Ho, koro de infan'!

Ho, koro de infan'...
Kiel juvel' brilanta,
La roso de patrina am'
La fundon kovras.
Ho, koro de infan'!

Ho, koro de infan'...
Iam kruela mano
Sensente ĝin detruos,
Forvelkos florkalik'
Kaj restos nur patrina am'.